نصايح قبل سيرت البر

[أفاق : الاداره]

السلام عليكم ورحمة الله وبركاته

نصايح قبل سيرت البر

كلنا نحب نروح البر ونحب نعزب فيه كم يوم ... يعني نخيم في البر


اولا : التخييم

تنصب الخيام في مكان تثبت فيه الاوتاد عشان ماتهز الخيام الريح وتطيرها ، او تفتك الاوتاد واطيح الخيمه ..

وتنصب الخيام على مسافات شبه متقاربه عشان الذاري (( المهب ،، الريح))

يتجنب نصب الخيام في البحص والسيوح اللي فيها انحدارات او على مجاري الوديان وذلك تجنبا لاي خطر ..


اهم شي لطلعت البر هو الزاد ..


والزاد مقسم الى :

الماء تانكي ماء بو بزبوز موجود يسونه طلبيه للمسوح والتغسيل ويكون في السياره
وكلما فرغ ذهبوا به و وعباؤوه

الطعام ثلاجة يوضع بها اللحم والدجاج والثلج اعلاه واسفله ثلاجة رحله

و في الرحله لاحد يعتمد على الدكاكين ،، يعني بنسير وبنلقى دكان او محل وبنشتري منه ماء واكل ؟؟

الافضل ان الماء اول شي لازم ينشل .. والماء نوعين

شروب: للشرب وطهي الطعام وعداد القهوه والشاي
غسول: للغسيل والاستخدامات الخاصه كما ذكرنا سابقا

من المعروف ان البر مكان خلي ولهذا ماحد يلعب بالماء في البر لانه اهم شي هو الماي .

الطعام .. اول شي تشله الاسره الخليجيه هو العيش ((الارز)) لانه الغذاء الكامل المتكامل .. والطعام في البر يختلف عن اللي في البيت وطريقة طبخه ايظا تختلف .. ففي البر تنقسم الوجبات الرئيسيه الى :

ريوق: على حسب .. مثل بلاليط .. قرص .. عصيده.خبيصة. خمير وغيرها ..
غداء: كبسه لحم
عشاء : مكرونه كبسه .. مشاوي ..

ومن الاشياء الضروريه ايظا هي اللحف:
الاغطيه الكافيه والتنويع فيها .. مثل اغطيه البرد .. والفرش والبسط زوالي خفيفه (( جمع زوليه )) والحصر (( جمع حصير )) والوسايد .. والبطانيات ..

وللحفاظ عليها يجب عدم تركها خارج الخيام في وقت الصبح .. بسبب الطل والضباب

وفي وقت الليل .. لنفس الاسباب ..

اما في وقت الظهر والشمس فتنشر اللحف في الشمس وذلك للتعقيم

نتطرق الى اختيار الاماكن المناسبه .

يوم نبى نخيم بالصوره الصحيحه نختار مكان سهل ومنبسط وبعيد عن مجاري الاوديه وعن المنحدرات الجبليه .. هذا اذا كان التخييم في الوديان والشعاب ..

اما اذا كان في البر فافضل مكان هو حول الظلال وحول العراقيب .. ولايتم التخييم فوق النقيان او العراقيب .. ولكن يختار مكان عدالهن عشان الذرى ...


طريقة نصب الخيام :

طبعا يتم تنصيب الخيام بشكل ثابت ومحكم ولايكون التخييم بشكل متباعد جدا .. بل على مسافات قريبه ومتساويه .. وذكرنا السبب .. اللي هو القرب من بعضها البعض .. تجنب الذاري والمهب بالاظافه الى تشكيل مخيم متقارب من اجل تغطيه المكان ..

نصايح:

عدم شب الضو داخل الخيمه وذلك تجنبا للحرائق وابتعادا لمشاكل الوقوع فيها من قبل الاطفال

الضو تنشب عدال كل خيمه وبعيده شوي منها .. والضو العوده في مكان يجمع مابين الخيام .. ولكن الافضل عدال اكبر خيمه او اكبر الموجودين سنا ..

عدم رمي المخلفات عدال اماكن التخييم وذلك تجنبا للحشرات والقوارض

عدم القاء اي نعمه عدال اماكن الاقامه وذلك تجنبا للدغ والحيوانات الليليه والبريه

الحفاظ على اماكن الاقامه

الانتباه الى الاطفال واماكن لعبهم

اخذ الحيطه والحذر والتزود بكافه طرق الحمايه والمستلزمات الطبيه والضروريه

التوقيع :

اللهم صل على سيدنا محمد عبدك ونبيك ورسولك
النبي الأمي وعلى آله وصحبه وسلم تسليما عدد مااحاط به علمك
وخط به قلمك واحصاه كتابك
وارض اللهم عن سادتنا ابي بكر وعمر وعثمان وعلي
وعن الصحابة أجمعين وعن التابعين وتابعيهم بإحسان الى يوم الدين