خصيبه : السلام عليكم .. مرحبا بعرب زايد ..
عوشه : هلا و الله .. و مرحبا الساع .. خبرونا عن أحوالكم .. بربكم بخير .. إن شاء الله دوم بنعمه و خير ..
خصيبه: أقول عوشه .. ما خبرتيني .. عن العرس اللي رحتوه ..
عوشه : الله يا خصوب .. عرس ما ينوصف .. صراحه ما عليهم كلام .. ما قصروا .. عرس يسولف بزينه كل الناس ..
خصيبه : ياله يا لبيبه اللبيبه خبريني قصدي يا عوشه .. السموحه يا لغاليه ..
عوشه : بخبرج .. ببتدئ بالاكل .. تمت يا خصوب اللحوم و الشحوم على الصحون .. و الحلوى من صوب ..
و الفواكه من صوب .. صراحه ما تم شئ ما يابوه .. وبعدين احنا في طبع عندنا الاكل يزيد و لا ينقص .. يقولج ذابحين 20 رأس بوش و 10 من البقر و 50 من الغنم .. بذمتج هذا مب اسراف و حرام ..
خصوب : خلي عنج ها الرمسه و كملي .. ياله بسرعه .. خبريني عن الزهبه .. (الزهبه: مايحمله أهل المعرس للعروس و اهلها )
عوشه : الزهبه الله يسلمج .. يايبين 6 شنط لأهل العروس ما مخلين من ثياب ونعل وعطورات و عود .. تبين الصراحه اهلها سنه ما بيسيرون السوق .. أبو العروس احتمال يفتح محل تجاري للملابس و غيرها .. هاهاهاهاهاهاها
خصوب : يا عوشه ربي يهديج .. كملي .. و العروس شو يايبين لها ..
عوشه : هني العوق .. بتموتين وتبي تعرفين .. بخبرج .. يايبين لها 3 شنط .. شنطة ملابس و شنطة عطورات
و بخور و الطيب كله و شنطه ذهب .. تبين الصراحه لو تعطيني ذهبها ببيعه و بشتري ناقه سبوق .. و بشارك بالسباق ..
خصوب : يا عوشه ذبحتيني .. كملي ..
عوشه : ان شاء الله بوفي كلامي .. والا الرزفه يا خصوب .. شو أقول و شو اخلي .. رزفه طول الليل .. و الشعراء اللي يشوفهم يقول بساحه حرب و هم يعدون القصيد ..
ما شاء الله عليهم .. تعرفيني امووووووووت بالقصيد .. اشوفني بخذ لي شاعر يقصد لي طول الليل ..
خصيبه : تبين الصراحه .. ما يسوى علي ذبحتيني .. كملي العروس شو لابسه ..
أكيد لابسه فستان .. ذيل الفستان صوب و الطرحه صوب .. و الاحمر و الاخضر
عوشه : عيب و منقود .. العروس لابسه ثوب و كندوره .. التطريز عليهم كم يسوى .. و الذهب على رأسها .. وفي ايديها .. تقولين محل مجوهرات متنقل ..
بنت القبايل .. ما تنسى زي أهلها .. و الله أنها طالعه قمر بلبسها و زيها .. صراحه ما عليهم أي كلام ..
خصيبه : خلاص ما اريد أعرف شئ .. لا تخبريني ..
عوشه : ما تستحين .. بعد ما عرفتي كل شئ ..
خصيبه : بس ما خبرتيني شو صار .. لولد عمنا .. لما راح العرس ..
عوشه : بس عاد .. هذا بروحه حكايه عقب بخبركم عنها .. ولا شو رأيكم يا جماعه الخير ..
خصيبه : ما عليه .. بنتريا .. لا حول و لا قوة الا بالله .. بنتريا .. اشهد مذله ..
مجرد وقفه:
مازالت تفوح في الأجواء عبق البخور ..
ومازالت عاداتنا في الاعراس عطر يفوح شذاه ..
ويحمل في طياته أصالة شعب و أريج وطن ..
وستظل عاداتنا و تقاليدنا رمز لأصالتنا ..
مهما حاولت رياح التطور ان تزيلها ..
أمة بلا ماض .. هي أمة بلا حاضر
__________________
عوشه: سلام من الله عليكم و رحمة منه .. اشحالكم يا عرب زايد .. و اشحالج انت يا خصوب .. و علومج يالغاليه .. عساج بخير
خصيبه : بخير دامج بخير يا بنت العم .. و عساج دوم بنعمه ياربي ..
عوشه : الله يحفظج يارب ..
خصيبه : أقول الغاليه .. ترى ما خبرتينا عن سالفة ولد العم .. شو صار له ؟؟
عوشه : والله يا خصوب اللي صار له ما صار لأحد .. سالفه بتسولف فيها العربان دهور .. سمعي بخبرج ..
خصيبه : كلي أذان صاغيه .. هاتي السالفه ..
عوشه : الله يسلمج عمنا معروف بطيبه و الكرم و قبل العرس حب أنه يطرش لأهل المعرس العينيه ( العينيه : هي بمعنى المساعده أو العون و تقدم للمعرس و أهله .. إما تكون مال او أغنام او غيرها من الاشياء الأخرى ) فراح الشيبه وياب لهم تيس و صخل و عنز .. و حطهم بالسياره وقال لولده بو خدود حمرا يوصلهم لبيت المعرس ..
خصيبه : والله عمنا فيه الخير .. و العينيه دل على طيب الناس و حبهم للمساعده .. الأ بسألج اللحين ليش ببطاقات الدعوه يكتبون ممنوع اصطحاب الاطفال ..؟
عوشه : قصدهم مب عدم اصطحاب الاطفال .. قصدهم عدم اصطحاب الخرفان و المال أفضل .. يعني يبون العينيه بيزات مب خرفان ..
خصيبه : دومج راعيه سوالف و تخلطين الجد بالغشمره .. كملي السالف ..
عوشه : المهم راح بو خدود حمرا .. وركب السياره و مسك الخط .. قاصد بيت أهل المعرس .. بس الخبل ما يعرف البيت .. قال اكيد جدام بيتهم بتكون ربشه و بعرفه .. راح وصل لبيت جدامه زحمة ناس .. ونزل يفك التيس و الصخل و العنز . لو شفتيهم يا خصوب تقولين بعارين .. أول ما نزلهم أقفزن مثل الغزال ، التفت يمين و يسار يمكن يلقى أحد يساعده .. وصرخ بعمال هنود ياولد أمسك، ولكن من غير أية فائدة،،، وبدأ بعملية المطاردة ،، وألحق ما تلحق،، وراره وراه،، تصيد ما تصيد، يمين يمين، يسار يسار،، و انت تعرفين لياقة ولد عمج صفر من كثر اليلسه جدام الكمبيوتر .. المهم بالنهايه مسكهم و عطاهم لصبي من بيت المعرس .. بس ولد عمج ضاعت كشخته من الجري .. الغتره اعتفست .. و الكندوره صار لونها عجب .. المهم وصل و جلس مع اهل المعرس وهو ما يعرفهم يعرف بس ولدهم .. سلم عليهم وضيفوه .. وسألهم عن المعرس .. ويوم وصل المعرس .. زين ما اغمى على ولد عمج .. طلعوا الناس مب هم الناس .. ياهي فشيله .. شو يسوي .. راحت العينيه .. حط طرف كندورته بين ضروسه وركب سيارته وطار لابوه ..
خصيبه : وحليله .. وشو سوى عمي ؟؟
عوشه : قاله قم يا بو خدود حمرا خل الكمبيوتر ينفعك أنت لو فيك خير سرت زرت يدتك المريضه بس الغلط مب منك من اللي مطرشنك .. هذا كله من قل معرفة الناس .. و من قل التواصل .. وحلف ما يطرشه مره ثانيه وسار الشيبه ها المره بروحه وصل العينيه .. بس المره عطاهم بعير ..
خصيبه : والله سالفه .. صدق عمي والله هذا كله من قل معرفة الناس و التراحم من بينهم .. سوالفج ما تنمل بس سمحي لي يالغاليه انا بروح لأمي احيدها مريضه شوي ..
عوشه : الله يعافيها .. صبري بسير وياج .. و بوصف لها دوا ..
خصيبه : وحليلها امي .. بنخسرها .. و السبه دواج ..
وقفه :
سيظل الخير في القلوب ..
وستظل العينيه مظهر من مظاهر التراحم
بين أبناء مجتمعنا .. ودليل على حب
مد العون .. و المساعده ..
ومهما قل التواصل .. ستظل هذا العادات تحرك مشاعرنا
وتزيد من ترابطنا ..
العرض العادي
